पर्साको नगरपालिकामा दमकल छैन नेता तथा कर्मचारी भारतको मुख ताक्दै !!


पोखरीया नगरपालिका वडा नम्बर ४ मा रहेको वशिष्ट नारायण वर्णवालको घरमा शनिबार आगलागी भयो । बिहान पौने ९ बजेतिर लागेको आगो निभाउने दमकल नहुँदा अढाई घण्टापछि मात्रै नियन्त्रणमा आयो ।

बिजुली सर्ट भएर भएको आगलागीमा १५ लाख जतिको क्षति भएको प्रहरीको प्रारम्भिक अनुमान छ । आगो नियन्त्रणका लागि वीरगञ्जबाट बारुण यन्त्र लग्नु परेका कारण आगलागीबाट बढी क्षति भएको हो ।

पोखरीयाका धर्मेन्द्र चौरसियाले पोखरीयाको बारुण यन्त्र सञ्चालनमा नआएकै कारण शनिबारको घटनामा बढी क्षति भएको बताए । ‘पोखरीया नगरपालिकाको दमकल सञ्चालनमा रहेको भए, शनिबारको आगलागीमा त्यत्रो क्षति हुने थिएन,’ उनले भने ‘पोखरीया नगरपालिकाको कार्यालय नजिकै भएको आगलागी निभाउन वीरगञ्जबाट दमकल ल्याउनुपर्दा समय लाग्यो र बढी क्षति भयो ।’

वारुण यन्त्र छिट्टै पुग्न सकेको भए आगलागीबाट त्यति क्षति नहुने स्थानीय बताउँछन् । इलाका प्रहरी कार्यालय पोखरीया, सशस्त्र प्रहरी बेसक्याप पोखरिया र स्थानियबासीले सदरमुकाम वीरगञ्जबाट गएको बारुण यन्त्र (दमकल)को सहयोगमा अढाई घण्टापछि आगो नियन्त्रणमा लिएका थिए ।

पोखरियाको दमकल प्रहरी कार्यालयमा थन्कियो

पोखरीया नगरपालिकाको वारुणयन्त्र चालु अवस्थामा नरहेको कारण आगलागी समयमै नियन्त्रणमा आउन नसकेको भन्दै स्थानीय आक्रोशित भए । स्थानीयले नगर प्रमुख दीपनारायण रौनियारको विरोधमा नाराबाजी गर्नुको साथै तुरुन्त वारुण यन्त्र सञ्चालनमा ल्याउन आग्रहसमेत गरेका छन् ।

पोखरिया नगरपालिकामा गत असारमा ५२ लाख रुपैयाँको लागतमा दमकल खरिद गरिएको छ । तर कर्मचारी अभावमा दमकल एकपटक पनि सञ्चालनमा आउन सकेको छैन । नयाँ बारुणयन्त्र ८ महिनादेखि अलपत्र छ । पोखरिया नगरपालिकाले बारुण यन्त्र इलाका प्रहरी कार्यालय पोखरियामा थन्क्याएर राखेको स्थानीय दिनानाथ साह बताउँछन् । इलाका प्रहरी कार्यालय पोखरिया परिसरमा खुल्ला स्थानमा राखेका कारण घामपानीले गर्दा दमकलमा खिया लाग्न शुरु भइसकेको छ ।

१४ वटा स्थानीय तह रहेको पर्सा जिल्लामा १ महानगर, तीन वटा नगरपालिका र १० वटा गाउँपालिका छन् । वीरगञ्ज महानगरपालिकामा तीन वटा दमकल छ तर काम लाग्ने एउटा मात्रै छ । एउटा पहिलेदेखि नै विग्रिएर थन्किएको छ । एउटा सुपर ग्यास उद्योगमा भएको आगलागीमा जलेको थियो ।

पोखरीयामा एउटा दमकल छ । त्यो प्रयोगमा छैन । त्यसले गर्दा पर्सा मात्रै नभएर छिमेकी जिल्लामा आगलागी हुँदा वीरगञ्ज महानगरपालिकाकै दमकलको भर छ ।

अब सुख्खा मौसम शुरु भएका कारण हावाहुरी चल्नेवित्तिकै आगलागीका घटना बढ्छ । जिल्लाको एक छेउमा रहेको सदरमुकाम वीरगञ्जमा मात्रै दमकल भएका कारण आगलागीको घटना भएको ठाउँमा दमकल पुग्न धेरै समय लाग्छ ।

भारतको आश

पोखरीया नगरपालिकाका प्रमुख प्रशासकीय अधिकृत नाथु साहले कर्मचारी नभएर दमकल सञ्चालन गर्न नसकिएको बताउँदै छिट्टै प्रयोगमा ल्याउने बताए । ‘दमकल आउँदा नै चुनावी आचारसंहिता लागिसकेको थियो, कर्मचारी नियुक्त गर्न सक्ने अवस्था थिएन,’ उनले भने, ‘अहिले चालकसहित ४ जना कर्मचारी नियुक्त भइसकेका छन्, भोलिबाटै सञ्चालनमा ल्याउने तयारी हामीले गरेका छौं ।’

वीरगञ्ज महानगरपालिकाले सुख्खा मौसम नजिकिएको कुरालाई मध्यनजर गरेर दमकल मर्मत गर्ने र नयाँ खरिद गर्ने प्रक्रिया सँगसँगै अगाडि बढाएको प्रवक्ता सुमन श्रेष्ठले बताए । ‘महानगरमा संख्यात्मक रुपमा तीन वटा दमकल छ तर काम लाग्ने एउटा मात्रै छ । एउटा मर्मत भइरहेको छ, एउटा खरिद प्रक्रियामा छ । अनि एउटा दमकलका लागि वीरगञ्जस्थित भारतीय महावाणिज्य दूतावाससँग आग्रह गर्ने कुरा छ ।’

उनले भने, ‘सुख्खा मौसममा आगलागीका घटना बढी हुने भएकाले कम्तीमा तीन वटा दमकल चालु अवस्थामा राख्ने सोच हामीले बनाएका छौं ।

बहुदरमाई र पर्सागढीमा छैन दमकल

गाउँपालिकाको त कुरै छाडौं । पर्सा जिल्लामा रहेका दुईवटा ठूला नगरपालिकामासमेत दमकल छैन । दमकल नहुँदा आगलागी नियन्त्रण गर्न समस्या हुने देखिएको छ ।

पोखरीया बाहेक पर्सा जिल्लामा बहुदरमाई र पर्सागढी गरी दुई नगरपालिका छन् । ती दुवै नगरपालिकामा आकस्मिक सेवाका लागि दमकल छैनन् । न दमकल खरिदका लागि तयारी नै भएको छ ।

सुख्खा मौसम शुरु भइसकेको भएपनि दुवै नगरपालिकाले दमकल खरिदका बारेमा कुनै प्रक्रिया अघि बढाएका छैनन् ।

बहुदरमाई नगरपालिकाका प्रमुख नितेन्द्र साहले यस वर्ष दमकल खरिद गर्ने कुनै योजना नरहेको बताए । ‘यसपालि नगरमा दमकल खरिद गर्ने कुनै योजना छैन । एम्बुलेन्स खरिद गर्न बजेट विनियोजन गरेका छौं,’ उनले भने, ‘आम्दानी कम छ । नगरपालिकामा कर्मचारीलाई तलब खुवाउनै समस्या छ । वीरगञ्ज र पोखरीयामा दमकल छ, त्यसैबाट काम चलाउने सोचमा छौं ।’

उनले नगरभित्र रहेका पोखरी ठेक्कामा लागेपछि आन्तरिक आम्दानी बढ्ने र त्यसपछि मात्रै दमकल खरिद गर्ने योजनामा आफू रहेको सुनाए ।

पर्सागढी नगरपालिकाका प्रमुख लोकनारायण यादवले पनि नगरपालिकामा वारुण यन्त्र नरहेको बताए । ‘सुख्खा मौसममा गाउँघरमा आगलागीका घटना बढ्छ । तर नगरपालिकामा बारुण यन्त्र छैन । तत्काल खरिद गर्न सक्ने अवस्था पनि छैन,’ प्रमुख यादवले भने, ‘केन्द्रबाट दिने कुरा पनि सुनेको छु, केन्द्रले पठाएन भने खरिद गर्नुपर्ला ।’अनलाइन खबर बाट लिएका हौ

२०७४ फागुन २० गते

फेसबुकबाट कमेन्ट गर्नुहोस |
सम्बन्धित शिर्षकहरु
  • आदिवासी जनजाती माहासंघ ईजरायलको छैठौ वार्षिकउत्सव तथा अधिबेशन सम्पन्न: अध्यक्षमा नरेश कुमार श्रेष्ठ
  • सानु खतिवडाको संयोजकमा १० सदस्यीय नमस्ते नेपाल हातेमालो सा.स.इजरायल समन्वय समिती गठन (तस्विरहरु सहित )
  • राष्ट्रिय तामाङ घेदुङ इ.को प्रथम बार्षिकोत्सब तथा अधिबेशन सम्पन्न:बिमला मोक्तान तामाङको अध्यक्षतामा २९ सदस्य समिति गठन
  • युवा गायक रनक बस्नेतको मन्द मुस्कानले बजार ततायो, भिडियो सहित
  • © 2018: शुभ दिन All Rights Reserved. Designed by: NetKuti